-      Таван толгой, Оюу толгой том төслүүд хөдлөх ёстой юу?

-    Хөдлөх ёстой, гэхдээ ард түмэнд ашигтай байдлаар

-    Хотын утаа арилах хэрэгтэй юу?

-    Ард түмэнд ашигтай байхаар л арилах ёстой

-    Төмөр зам баригдах хэрэгтэй юу?

-    Зайлшгүй хэрэгтэй, гэхдээ өргөн нарийн царигаа сайн хэлэлцэхгүй бол болохгүй

-    Тэгвэл нүүрсээ тэмээгээр зөөж болох уу?

-    Амьтны эрхийг хамгаалах төрийн бус байгууллагуудтай зөвшилцсөний үндсэн дээр бол болохгүй гэх газаргүй.

-    Хуулийн салбарт шинэчлэл хэрэгтэй юу?

-    Угаасаа шинэ салбар

-    Хүүхдийн боловсрол чухал асуудал мөн үү?

-    Хүүхдүүд эхлээд хүмүүжих хэрэгтэй

-    Туул гол дагуу хурдны зам тавих асуудал яасан бэ?

-    Хүннүгийн үеийн булш бунхан гэсэн стратеги геополитикийн чухал байгууламжуудаа эхлээд аврах хэрэгтэй.

-    Тэц-5 баригдах хэрэгтэй юу?

-    Мэдээж баригдах нь зөв, гэхдээ байршлаа зөв тодорхойлох хэрэгтэй. Түүний дараа бария.

-    Тэц-3 ыг 50 МВТ –аар өргөтгөсөн нь зөв үү?

-    Тэц-3 ыг өргөтгөх нь зөв. Гэхдээ хятадад хэрэглэгдэхээ больсон хуучин турбин суурьлуулсан нь буруу, эрчим хүчээр хятадаас хараат болчихож байгаа хэрэг. Буцааж буулгаад шинэ технологи суурьлуулах хэрэгтэй.

-    Эгийн голын УЦС барих нь зөв үү?

-    Мэдээж барих нь зөв, гэхдээ зээл авч барьж бол болохгүй. Гол нь зээл гэдгийг нь эсэргүүцээд байгаа хэрэг.

-    Ер нь Монгол улс хөгжих ёстой юу?

-    Хөгжил гэж юуг хэлэхээсээ л шалтгаална даа...

... Ихэнхи нь албаны хүмүүсийн жинхнээсээ ярьсан, хариулсан байдал юм шүү. Бүхнийг гацаагч нь зөвхөн Жэнко ч биш л дээ, жишээ нь З.Энхболд Ноён уулын алтыг ухах нь зөв гэсэн хэрнээ Таван толгойг гацаасаар буй. Сайханбилэг, Алтанхуягийн талынхан том төслүүдийг үргэлж “дэмждэг” хэрнээ Эгийн голын УЦС –ыг “эсэргүүцэж” нэлээд дуугарсан санагдана. Нэг нь үргэлж гацаагаад л, нөгөө нь босгох гээд л зүтгэдэг тийм юм ч гэж юу байхав. Мөнгөн дээр суусан нь барих гэнэ, мөнгөн дээр сууж чадаагүй нь гацаах гэнэ, одоо бол мөнгө ч үгүй болж. Пиншүү Ганбаа, поп Уянгаа, Даваасүрэн, Эрдэнэчимэг эд нарын хэдхэн популист л хамаг юм гацаачихна гэж байхгүй. Популистууд бол жинхэнэ гацаагчид биш, магадгүй жинхэнэ гацаагчдын хөл гар болоод л явж буй хэрэг, санаатай бас санаандгүй. Өнөө хэдэн “томчууд” бүлэг бүлгээрээ хэмлэлдээд, нэг нэгнээ нураагаад, эцэстээ алиа алдахаараа урд хөршөө царайчилдаг яг л 17 –р зууны байдал уруугаа орсон ч юм уу даа. Өвөрмонголчууд манжид хамгийн түрүүнд урвасан л гэх, ийм адгийн арчаагүй амьтадтай хэмлэлдэж хоосон амьдарсанаас урд хөршөө бараадаж тэнүүн амьдрая гэж санасан ч юм болов уу даа... Эвтэй сайхан хуваагаад, эвтэй сайхан урагшлуулаад явж болдоггүй хорвоо юу.