Жинхэнэ цэвэр амьтан байснаа саяхнаас л мэдлээ.

Бага сургуульд байхад багш минь хэлж байсан юм.  “Энэ нойлын ногоон тэгийн тархи цэвэрхэн хэвээрээ дууслаа, яана” гэж. Тэр үед намайг доромжилж байх шиг санагдаад гомдож байсан. Одоо бодохноо магтаж байж. Бага ангийн багшдаа баярлалаа.

Сүүлдээ найз нөхөд маань “Чиний намтрыг харахаар боловсрол гэсэн  хэсэг нь цэв цэвэрхэн цаас л болчих юм аа” гэлцэх. Тэрнээсээ ичээд намтраа хүнээс нуудагсан. Одоо бол харин ч бахархаж байна.  Өчигдөр хөдөлмөрийн бирж дээр очоод “Боловсролын хувьд цэвэр хүн ажил хайж байна” гэсэн чинь компаниуд булаацалдаад арай л тас татчихсангүй. Хүний шунал цаддаггүй гэж үнэн юм байна лээ. Тэр үед “ерөөсөө намтаргүй, тэр чигээрээ цэвэрхэн цаас байсан болоосой” гэж бодогдоод авч байна лээ.

Бохир хүмүүс надад “ Юу ч бүтээхгүй яаж амьдарч байна аа. Чамайг буцахын цагт хорвоод юу ч үлдэхгүй нь байна” гэлцдэг байсан нь одоо бодоход цэвэр атаа жөтөө л байсан байж таарлаа.

Би үйлдэл бүхнээрээ цэвэр нэгэн. Наад зах нь амьтан алдаггүй.  Зөвхөн   хэн нэгний алсан амьтны махыг л иддэг.

Хэрвээ үхвэл (би ер нь сайн хөөцөлдвөл үхэхгүй ч байж магадгүй гэж боддог) Эрлэгномун хаанд ингэж  хэлнэ боддог. “Би бусад шигээ хонь алаагүй, дандаа нас барсан иргийн ууц зооглож байсан. Худлаа гэвэл миний гар ийм цэвэрхэн” гэж хэлнэ.

Мэдээж, Эрлэгхаан тэнэг биш болохоороо миний гарыг “Тайд”-аар угаасан эсэхийг шалгах л байх л даа.  Би “Ваниш”-аар угаачихсан юм чинь юунаас айх билээ.

Миний гар үнэхээр цэвэрхэн. Ер нь бие, хөл, булчин цэвэр...тархи  цэвэр гээд цэвэргүй юм байхгүй дээ.  Тэр жил  Зөвлөлт явж байгаад тархиа хөдөлгөчихвөө. Толгойныхоо рентген зургийг авахуулсан чинь яасан гэж санана. Цэвэр тархи үзээгүй оросууд бүр алмайрчихсан “Энэ товарищийн тархий  где?” гэлцээд байж уу?

Миний цус ямар цэвэр гэж санана. Бохир хүний цус улаан байдаг бол минийх тув тунгалаг. Нармайгаа нээлгэчихээд хамраас цус гоожоод явж байхад хүмүүс “Яасан, ханиад хүрчээ юу? Хамраас чинь ус гоожоод байх чинь” гэж хэлдэг.

Миний сэтгэл ч  цэвэр. Ахмадууд хэлдэг байсан юм “бузар цэвэр сэтгэлтэй хөвүүн” гэж. Хайр дурлал гэхчлэнгийн эротик юмаар завааруулаагүй сэтгэл ч цэвэр байлгүй яахав.

Миний нэр бүр цэвэр. Зарим хүн “Нэр хугарахаар нэрийн хуудас хугар” гэж хэлдэг. Харин би нэрийн хуудсаа ч цэвэр байлгадаг. Ийм учраас миний нэрийн хуудсан дээр юу ч бичигддэггүй. Уг нь огт нэргүй байсан бол бүр л цэвэр байх байж.

Ойрдоо би ч  ганцаараа цэвэр биш болох нь мэдэгдээд байна. Өчигдөр видео прокатнаас кино авсан чинь хов хоосон Си ди өгсөн байв. Улаан галзуу юм эргээд очсон чинь урдаас “Бид цэвэр бизнес эрхэлж байгаа. Манай бүх бүтээгдэхүүн дотроо юмгүй цэвэрхэн” гэж байх юм.