Хугацаанд нь төлөөгүй бол тодорхой төлбөр, алданги тооцдог татварын хууль нэг жилийн өмнө батлагдсан. Төлөгдөөгүй татварын дүнд хугацаа хэтэрсэн хоног тутамд 0.1 хувьтай тэнцэх торгууль ногдуулж ирсэн. Гэтэл энэ оны 7-р сарын 1 нээс алданги нэмж тооцох бөгөөд хэмжээг нь засгийн газар жил бүр тогтоож энэ ондоо бол хоногын 0.06 хувь байх гэнэ. Гэхдээ нийт алданги төлөх ёстой татварын талаас хэтрэхгүй байх заалт бас байгааг хэн ч ярьсангүй. Энэ тооцоо компьютэрийн програмд нэгэнт оруулсан учир заавал авах болно гэж татвар газрын дарга нар зурагтаар сэрэмжүүлэв.

Ямарч гэсэн татвар, торгууль, алданги гээд гурвалсан дарамт татвар төлөгчийг хүлээж байна.

Татвар авах болохоороо төр засаг маань үнэхээр сайн ажиллаж, үргэлж шинийг эрэлхийлж хуулиа хурдан шуурхай өөрчилж, эсвэл янз бүрийн тогтоол гаргаж ер нь л бахдам сайхан амжилт гаргаж байгаа. Татвараа зарцуулах болохоороо тийм үр өгөөжтэй, ухаалаг, ил тод ажиллахгүй, зардлын талаар тодорхой ойлгомжтой мэдээ тайлан гаргахгүй байгаад татварыг төлөгчид нь сэтгэл дундуур байна.

Уг нь төсвийн хуульд татварыг яаж бүрдүүлэх, түүнийг юунд яаж зарцуулахыг зааж өгдөгч, энэ хууль янз бүрийн тодотгол нэрээр авах талаа тод болгож, зарцуулах талаа нуун далдалж ойлгожгүй болгодог нь тогтсон зуршил Уг нь илүү сайханыг л хүсдэг ч бахь байдгаараа.

Бидний урагшлах хөгжилд чөдөр болж байгаа хамгийн том саад бол улам бүр данхайсаар байгаа төр засаг өөрөө болжээ. Хүчээр янз бүрийн татвар, хураамж, төлбөр, алданги аваад хаана ямар хүүтэй хадгалж, юунд зарцуулж байгаа нь нуугдмал байгаа нь төр засгийн хүрээнд хээл хахууль үүсгэж, бидний амьдралын хэвийн үйл ажиллагаанд нэмэр биш нэрмээс болж байна.

Нүүрэн дээрээ ард түмний өмнөөс санаа зовсон дүр эсгэж, байгалын газар доор байгаа баялагыг төрийн түшээд тэдний холбоотнууд ил далдаар хувааж аваад, үлдсэнийг нь гоё нэрээр хуваагаад өгчихнө гэж хуурсаар, түүнийг нь хүлээсэн ард түмэн цөхөрчээ. Энэ хүлээлт сайхан амьдрах хувь хүний хариуцлагыг баллуурдаж, эрч хүчийг нь мохоож, ажил хийхээсээ гэрлэх, олон хүүхэдтэй болох, ер ядуу байх нь илүү орлоготой байх эрүүл бус хэм хэмжээг төр засаг өөр хоорондоо уралдан өөгшүүлж байна.

Ажил хийсэн татвар төлөгч нарын нуруун дээр өөрсдийн тансаг хэрэглээ, үр хүүхдийнхөө боловсролын зардлаа үүрүүлэн дарамталж байгаа төр засаг маань зардлаа бас энэ 7 сарын нэгнээс арай ил тод хоногын 0.006 хувь байхад ч яахав бодит үнэнээр нь тайлагнаж байхыг татвар төлөгчид хүсч байна.

Харин бид төр засагтаа өөрийн үндсэн үүрэг болох хүмүүс, хөрөнгийг хамгаалж, хувь хүний эрх чөлөөг баталгаажуулах ажлаа сайн хийхийг хүсэж байна.


2009-07-02