Эрэгтэй гишүүдийг ойлгож байна аа. Өөрсдийн нь боломж алдчих гээд сандраад. Гэхдээ төлөөлөл нэмнэ гэж байгаад гишүүдийн тоог 126 болгосон биз дээ. Танд нэр дэвших боломж чинь байгаа ш дээ. Хүйсийн төлөөллөө хангаагүй байж цаашид бид төлөөлөл ярьж чадах уу. Өнөөдрийн өчүүхэн эрх ашиг яах вэ, гэхдээ та нарыг сонгох шинэ үеийн сонголтын мэдрэмж мааш өөр болсон шүү.

Ер нь хүйсийн тэгш төлөөллийг хангах дээр улс төрийн санхүүжилтээр намуудыг идэвхжүүлж, бас хянадаг дэлхийн арга байна. Үүнийг бид Улс төрийн намын тухай хуулийг ярих үедээ заавал бодолцох ёстой. Сууриас нь хөшүүргийг нь суулгаж өгөхгүй бол энэ сонгуулийн дэвшилтэт үзэж санаа дараагийн сонгууль дээр нэг хөлдүү даргын саналаар уначихдагийг бид харсаар ирсэн.

Шүүмжлэлд ийм мэдрэг байгаа шигээ нийгэмд буруу жишиг бий болгоод байгаа системийн гажуудлаа ​мэдэрдэг болчихвол, үгүй мөн олон асуудлыг бид шийдэж чадахаар байгаа юм даа.

Тогтолцооны түвшинд өөрчлөлт хийхгүй бол дараа нь дахиад л 60 тэрбумынхан гарна, ЖДҮ-чид гарна, Хөгжлийн банкийг тоногчид гарна, бас нүүрсний хулгайчид тасрахгүй. Хэчнээн их шуугисан билээ. Тэгээд хэнд ямар хариуцлага үүрүүлсэн билээ. УИХ-ын даргыг нэг буулгасан байх, ЖДҮ-гээс арга саамаа олж чадаагүй, ганц нэгээр туг тахисан байх, бусад нь бахь байдгаараа. Одоо л өөрчлөлтийг хийхгүй бол хулгай нүүрлэсэн завхрал зогсохгүй.

Хэдийгээр бид парламентын засаглалтай улс гэдэг ч гадаадын судлаачид манайхыг хагас парламентын засаглалтай гэх нь бий. Учир нь парламентын засаглалтай ч эрх мэдлийн хуваагдал ихтэй, хайбрид маягтай л даа.

Үндсэн хуульд нэмэлт өөрчлөлтийг хийх үйл явц бол тийм ч амар биш. Яагаад гэвэл УИХ-ын гишүүдийн 75 хувиас дээш буюу 57-гоос дээш хүний санал нэгдэж байж л асуудал шийдэгдэнэ. Харин улс төрийн сонирхол, нөхцөл байдал, улс төрийн хүчнүүд голынхоо аль талд байгаа эсэх, төрийн өндөрлөгүүдийн ойлголцол, иргэдийн хүлээн зөвшөөрөлт гээд олон зүйл нөлөөлнө. 2019 оны Үндсэн хуулийн нэмэлт өөрчлөлт бас ч гэж тэрхүү даваа гүвээг даван байж, хорь шахам жилийн дараа хийгдсэн нэмэлт өөрчлөлт болж байлаа.