Ардчилсан, чөлөөт нийгэмд иргэн хүн хуулиар хориглоогүй бүхнийг хийх эрхтэй, харин төрийн албан тушаалтан зөвхөн хуулиар зөвшөөрч зохицуулсныг хийх үүрэгтэй. Гэтэл төрд гарсан хүмүүс хүссэнээ хийж байгааг юу гэх вэ?

Өнөөдрийн байдлаар манай (өөр хаанахын байхав) дэлхийгээс 614 хүн сансарт нисчээ. Үүнээс 364 нь Америк, 135 нь Оросын, 20 нь Хятадын, үлдсэн 95 нь бусад улс орны иргэд гэсэн статистик байна. Манайх ямар ч байсан Ж.Гүррагчаатай. Сансрын баатар маань дараачийн хүнийг нисгэх цаг болсон талаар дуугарч байгаа. Заавал Орос гэхгүй, Америк, Хятадынхаар нисэхийг үгүйсгэх аргагүй болж байх шиг. Хажуугаар нь жендерийнхэн эмэгтэй хүнийг сонговол зохистойг анхааруулсан.

... Энх тайвны гүүрний зүүн талын Дунд гол ... Энд ямар ч барилга байх ёсгүй, голын ай сав, дэнж учраас зөвхөн мод тарьж, тохижуулж, цэцэрлэг, мэргэжлийнхэн хэлбэл усан сан байгуулах хэрэгтэй. Эндээс Сэлбийн сэргэлт эхлэх ёстой. Одоо баригдаад дуусч буй “Авлига” хороолол, баригдаж эхэлсэн усан парк гэгч бол байгаль орчны эсрэг гэмт хэрэг. Саяхан дараачийн барилгын суурийг тавиад даапаалж сууцгаана. Буулгах нэртэй хоёр блокийг хүртэл шүүхээр авч үлдэхийг санаархжээ. Дунд голын хөндийд багтахгүй их шунал.

Яг одоо Монгол ТВ-ээр “Тэргэл сар” нэртэй канадын урт сериал гарч байгаа. Англи нэр нь Blue Moon. Өөрийн үзсэн ганц хоёр ангиас мэдэж авснаа уламжлахад, америкийн нэгэн компани канадын ундны усыг хулгайлах (яг тийм үгээр орчуулсан) санаархлыг тойрч хоёр улсын нууц албад, бизнес, бүлэглэл, тагнуулууд хоорондоо бараг дайтаж байх юм.

Ингээд сэтгүүлчийг муухай харагдуулсны араас Гарамжавыг “баялаг бүтээгч” нэрээр өмөөрч цайруулах кампани эхэлжээ.