Ер нь Ерөнхий сайд магтуулдаггүй юм. Дандаа шүүмжлүүлж, муу муухайгаараа дуудуулдаг үйлийн үртэй албан тушаал. Ардчилсан хувьсгалаас өмнө намын дарга Ерөнхий сайдаа муулах нь битгий хэл сумын даргынхаа өөдөөс ганхийх хүн олддоггүй бүгд дуулгавартай байв шүү дээ. Тийм байсан иргэд чинь одоо хэн нь Ерөнхий сайдыг муулж байна тэр хүн хамгийн зоригтой, хамгийн ухаантай хүн болдог том жишиг нийгэмд тогтжээ. Ардчиллын анхны Ерөнхий сайд Д.Бямбасүрэнгээс эхлээд Засгийн газрыг муулах, болж өгвөл огцор огцор гэж хашгирах их аян өрнөсөн юм. Түүнээс хойш ямарч мундаг ажил хийсэн магтуулдагЕрөнхий сайд гэж төрөөгүй юм. Харин Алтанхуяг сайд огцорно гэж айлгүй  авлигажсан барилгуудын арьсыг ёстой нэг хуулах шиг боллоо. Татвар төлөгч бидний мөнгөөр барилга барих нэрээр улстөрчдийн ивээлд байдаг барилгын компаниуд мөнгө угаасаар хичнээн ч жил боловдоо. Улсын төсвийн хөрөнгө оруулалтаас хусдаг олон арга байдаг.Хамгийн цэвэрхэнээр хулгай хийх аргын нэг бол барилгад оруулсан улсын хөрөнгө оруулалтыг компаниудтайгаа нийлээд “цавчих” юм. Эрхэм гишүүд улсын төсөв хэлэлцэх болох дээр зэрэг л аймаг, сумандаа нэг их хайртай хүн болж хөрөнгө оруулалт гуйж гүйдэг. Манай аймагт театр, чуулга хэрэгтэй байна. Намайг сонгосон сумынхан соёлын төвгүй бол үхэх гээд байна гэж байгаад зураггүйч хамаагүй нэг барилга үнийн дүнгээр батлуулаад авдаг. Нэг батлуулаад авах юм бол төсвийг хэдэн жил ч дараалан нэмж болно. Өөрийнхөө юмуу намынхаа нөхдийн нэг итгэлтэй барилгын компанид мөнгийг нь гаргуулж өгнө. Тэгээд мөнгөө хуваан авч найрлаж гарна. Барилгууд босохгүй он дамжих тусмаа сайн.Яагаад гэвэл дараагийн онд мөнгөө нэмэхэд амар.Энийг л авлигажсан төсөв, авлигажсан барилга гээд байгаа юм.

 Ерөнхий сайд Н.Алтанхуяг урьд нь Сангийн сайд байсан болохоор мөнгө угаах энэ аргыг сайн мэднэ. Яаж тэмцэхээ ч гадарланагэсэн үг.Авлигажсан барилгуудын арьсыг хуулаад компанийг нь зарлаад ирэхээр зарим гишүүдийн царай эвгүй болж байв. Магадгүй хаврын чуулган эхлээд улстөрчдийн мөнгө угаадаг арга нь илрээд ирэхээр Алтанхуягийг огцруулна гэж дайрнаа.  Ичсэн хүн хүн ална гэж үүнийг хэлдэг юм. Барилгын нэрээр татвар төлөгчдийн мөнгийг янз бүрийн болхи аргаар гаргаж авна. Хөдөө багт явган хүний гүүр барина гэж хэлээд 2,4 тэрбум төгрөг гаргаж авчээ. Гүйцэтгэгч компани нь байхгүй байхад мөнгийг нь нэмж өгнө. Соёлын төв барина гэж төсөв хийгээд уурын зуух болгоод мөнгийг нь авчихжээ. Говь-Алтай аймгийн “Алтай” чуулгын барилга нэг тэрбум төгрөг байснаа одоо зургаан тэрбум 200 сая төгрөг хүрчихсэн явна. Зургаан тэрбум төгрөгийн 20 хувь нь цавчигчдын халаасанд орно. Харин мөнгийг “Заг“ гэдэг компанийн нэр дээр гарган үрэн таран хийсэн. “Си Эйч Си“ХХК гэдэг аж ахуйн нэгж Гандан хийдийн өргөтгөлийн барилга гэгчийг 12 тэрбум 892 сая төгрөгт хүргэчихээд байна. Хармаалах жишиг 20 хувь нь хэд бол.Эрүүл мэндийн яамны үе үеийн сайд нар тэдэнтэй үгссэн Геронтологийн төв хэмээх улсын эмнэлгийн дарга нарын халаасанд ордог их мөнгө байдаг. Мөнгө нь өсөөд байдаг барилга босдоггүй. Тэр барилга бол Геронтологийн төвийн гэгч дуусдаггүй барилга юм.  Хувийн эмнэлэгт газар нь олдоод 60 ортой ийм барилга барина гэвэл нэг тэрбумд өлхөн багтаах байлаа. Гэтэл дөрвөнтэрбум 724 сая төгрөг болчихоод мөнгөө нэхээд сууж байх юм. Уг барилга мөнгө хийгээд 3-4 жил болж байна.Мөнгө авдаг компанийн нэр “Арвис интернэйшнл“ гэдэг хувийн компани. Ядаж үнэн, худлаа зураг төсөв ч байхгүй тийм барилга барина гээд авчихсан тэрбум тэрбум төгрөгүүд ч байдаг. Дархан-Уул аймгийн Дархан суманд спорт цогцолбор барина гэж 2011 онд 11 тэрбум төгрөг тавьсан бол 2013 онд 21 тэрбум 495 сая төгрөг болгож өсгөөд улстөрчдөөр лоббидуулаад сууж байгааг юу гэж ойлгох вэ. Эндээс гэхэд л овоо юм унаа биз. Хэнтий аймагт үе дамжин сонгогдсон гишүүддээ мөнгө хийж өгдөг Хан-Хэнтий чуулгын барилга гэх сүүтэй үнээ байдаг юм байна.Дөрвөн тэрбум 400 сая төгрөг хүрчихээд байна.

Засгийн  газраас “АВЛИГАЖСАН ТОП 10 БАРИЛГА”-ыг зарлалаа



Авлигажсан объектууд хаврын чуулган эхлэхээр хуралдаанаар орно. Нэгэнт барилга барина гээд хуваагаад авчихсан энэ их мөнгө олон гишүүдийн эрх ашгийг хөндөнө дөө.Жишээ нь, Ховдын барилга ярих гэхээр цөөнхийн бүлгийн даргын царай хувьсхийгээд явчих байхаа даа.  Ерөнхий сайд Н.Алтанхуяг их л зоригтой авлигажсан барилгуудын арьсыг хуулаадэхэлчихлээ. Эхэлснээ гүйцээдэг цаг. Ажил хийж байх үед сайн нэр дуулдаг Ерөнхий сайд гэж ерөөсөө байдаггүй юм. Харин ард түмэн хэзээ нэгэн цагт үнэлдэг. Авлигажсан барилгуудын мөнгө угаагчидтай Сингапур, Хятад хоёр ийм нэг аргаар тэмцэж ялсан байх юм. Ийм барилгуудыг Авлигатай тэмцэх газар нь шалгаж, татвар төлөгчдийн мөнгийг алдангийн хамтаар буцааж төрд нь өгүүлсэн байна. Мөн барилгыг буулгах хугацаатай үүрэг өгч, зураг төслийг газартай нь хамт дуудлага худалдаанд оруулаад орон сууц барьчихжээ. Ямар ч гэсэн Ерөнхий сайд Н.Алтанхуяг авлигажсан барилгуудын арьсыг хууллаа.Одоо татвар төлөгчдийнхөө мөнгийг олж авах цаг болжээ.