Түүнийг “аялгуутай хүн” гэлцдэг. Хийсэн, бүтээснээрээ хэлэгдэж, хэлцэгдэж явах гэдэг тэр бүр хэн хүнд оногддоггүй тавилан байж болох. Гэвч түүнд сэтгэл буй. Үзэл бодол, эргэцүүлэл, шаналал тайтгарал, бухимдал ч бий. Хүн харагдаж байгаа шигээ байдаггүй. Үргэлжийн инээмсэглэлээрээ бүгдийн нүдэнд харагдах хэрнээ дотроо хүнд хэтэрхий бодол агуулсан нэгэн ч  байх. Өнгө үзэмж, царай төрх, харагдац үзэгдэц төдийхнөөр хэнийг ч дүгнэн цэгнэх боломжгүй. Нийтлэлч Д.Энхболдбаатарын хөтлөн явуулдаг “Солбицол” ярилцлагын нэвтрүүлгийн зорилго нь оролцогчийнхоо “жинхэнэ дүр төрхийг” буюу дотоод хөргийг үзэгчдийн нүднээ дэлгэн харуулахад чиглэдэг юм.