Хүмүүс тэрнийг тэнэг гэдэг байсан. Би яаж мэдхэв цус гэж “үнэхээр тэнэг юмуу чи” гэж асуухаар толгой дохьдог юм, тэгэхээр тэнэг л юм байлгүй. Хавийн бацаанууд гүйлдэн очоод “Хэнээ боовоо харуулчих” гэхээр шууд өмдөө шувтлаад инээд алддаг. Бацаанууд юугаа мэдхэв, зүгээр л насанд хүрсэн хүний эрхтэн хараад баясаа л биз, цаашаа өөр хөгжилдөх юм хайн инээлдэн одно. Бацаануудын хувьд тэр үйлдэл ямар нэг бэлгийн чиг хандлагатай холбоогүй зүгээр л Дисковери сувгийг аамплагедаар үзсэн мэт сэтгэгдэл төрнө.
    Заримдаа “Тэнэг” –ийн элдвийг үзэн баясах зуур хазгар өвгөн хүрч ирээд таягаараа хүүхдүүдийг балбаж явуулдаг. “Битгий хүүхдийн мууг үзээд бай” гээд л үрчийсэн нүүрээ улалзуулан хөгшин хоолойгоороо өвгөн орилно. Энэ үед нь хүүхдүүдийн ээж аав нар өвгөний вандализмыг хараад нударгаа зангидан цээжээ дэлдэн хүрч ирээд “наад мэдрэл юмаа аваад эндээс зайлахад яанаа, хүүхэд алчихаарай муу төгцөг минь” гэж сахилгагүй хөвгүүдээ өмөөрдөг.
    Харин “Тэнэг” –ийг өмөөрөх хүн өвгөнөөс өөр хэн ч байхгүй, тэнэгийн ээж аав гэж нэг ч удаа харагдаагүй юм. Тэнэг магадгүй харь гаригаас ирээд хүний дүрд хувиран яваа биет юм болуу.
    Эсвэл ээж аав нь мэдрэл муутай хүүхдээ голоод хаясан ч байж магад, тэгээд хөөрхий өвөө нь авч өсгөөд өдийг хүргэсэн байх. Өвөө нь гэж яг төрсөн өвөө нь юм болуу бүү мэд.
    Эсвэл ээж аав нь ослоор өөд болох үед хөөрхий хүү цочролд ороод ийм тэнэг болсон ч байж магад.
    “Миний аквиурамтай загаснууд буруу яваад байхаар нь би загасны шүүрээрээ эргүүлээл хаячихсан, тэгээд манай өвөө нэг баясах юмтай болж байгаа даа, миний цамцны ханцуйнд хоол наалдчихаар нь нөгөө тийш нь харуулчихдаг ш д” гэх мэтээр элийрнэ. Дээгүүр нисдэг тэрэг харагдахаар “хөөе садаам хусейн байна уу наана чинь” гэж орилно.
    Өвгөний залуудаа ажиллаж хөдөлмөрлөхийн цэнгэлийг эдэлж явсан юуны ч юм нэг үйлдвэрээс нь шарилын чулуу мэт хэдэн үсэгтэй хана л үлдсэн гэсэн. Харин өөрт нь баахан одон медалиуд, гоёмсог гялгтганах хуучны нүнжигтэй металууд. Настайчууд баяр ёслолоороо зүүдэг төр намын хишиг, шагнал алдар гавъяаны илэрхийлэл, энгэрээ дүүргээд дээлээ гоёдог нандин зүйлс нь мань өвгөний хувьд зүгээр л өнгөрсөн үеийн дурсамж.
    Тэнэг хүү өвгөний медалиудыг зүүж тоглох их дуртай. Хүү хүү л гэнэ уг нь бол гуч гарч яваа залуу юм шүү дээ. Өөрийг нь шоглодог бацаануудыг найзаа гэж бодсондоо гоё медалиудаа гайхуулж үзүүлнэ. “Хөөе миний энэ гоё тэмдэгнүүдийг та нар зүүмээр байна уу” гэхэд нөгөөдүүл нь “наадуул чинь яах вээ, маниустаа боовоо дахиад нэг харуулчих” гэхээс цаашгүй. Тэгээд л татаж унатлаа хөхөрч баясалдаад хөөрхий тэнэгийг ярианы сэдэв болгон хэдэн хормыг барна.
    “Наад медалиудаа энэ бөглөөнүүдээр сольчих тэгэх үү” гэж нэг бацаан нь сэргэлэнтэж өвөөгийнх нь хамаг гоё медалиудыг нь хамаад алга болсон.
    Бацаанууд бүгдээрээ ундааны саванд шээгээд тэнэгт уулгаж шоглохоор шийдэв. Тавин хувь нь ундаа тавин хувь нь шээс, бас жаахан шүлс орсон өөрсдийн “нэрийн коктэйл” –ийг тэнэгт аваачиж өгсөн. Тэнэгийн ам нь цангасан юм байлгүй ямартай ч талд нь ортол уугаад ярвайснаа “хугацаа нь дуусчихсан ундаа юмуу даа тээ, жаахан гашуун амттай юм байна” гэхийг сонсоод бүгдээрээ ямар ч хошин шог үзсэнээс илүү инээсэн. Дараа нь давраад царцаатай бургер шарилжны салаттай идүүлсэн, тэр юуг ч үл тоон хусч л орхидог. Гэхдээ амт нь таалагдаагүй нь тодорхой л доо байнга ярвалздаг.
    Бацаанууд дараа нь “бид нар чамд англи хэл зааж өгье за” гэхэд нь тэнэгийн баярласан гэж жигтэйхэн. Бага ангийн багш нь цагаан толгой заах гээд хүчрэхгүй болохоор тэсэлгүй уурандаа элэг бөөрөнд нь балбаж явуулсанаас хойш эрдэм заах хүн лавтайяа хорин жил тааралдаагүй. Тиймээс тэр их дуулгавартай шавь болсон. “Ай ээм стюпид” энэ бол бацаануудын хамгийн анх тэнэгийг чангаар олон дахин хэлүүлж давтуулсан өгүүлбэр. Бацаанууд мөн ч их хөхрөлдсөн. Тэр ч сайхан тод хэлдэг болсон. Дараа нь элдвийн гадаад үгнүүд ч урсаж өгсөн дөө. “Ай ээм пииг, ай ээм доонкий, ай ээм фаакан шээт” гэдэг үгсийг тэнэг хүү аравтын хүрд уншиж байгаа мэт давтан давтан хэлэх нь бацаануудад тунчиг зугаатай. Аа юү сюр (are you sure) гэж асуухад нь Еэс ай ээм стюпид гэж хариулах ёстой.
    Тэнэг яриан дээрээ гадаад хэл нэмчихээр бүүр нэг холион бантан болно. Ёстой солиотой согтуу нь ялгагдахгүй, англи монгол нь танигдахгүй хачин амьтан тэрүүгээр нэг бацаануудыг баясган явах. “Чулууг англиар юу гэдэг юм бэ, уурлах гэхийг юу гэх вээ, хүүхэд гэхийг юу гэдэг юм бээ” гээд л хүн болгоноос асуугаад л хэлсэн элдвийн үгсийг нь тэнэг ухаанаараа тогтоож ядна.
    Өвгөн “тэнэг хүү” –гийнхээ байгаа байдалд бүүр дасал болчихсон, гутарч гуних нь битгий хэл харин ч “яахав дээ бусдад муу юм хийх биш, тэр минь хэзээ ч уйлдаггүй дандаа инээж явдаг юм, юунд ч санаа зовохгүй юунаас айдаггүй жаргалтай хүн байхгүй юу” гэж магтдаг. Нээрээ бодоод байхад тэнэгийн уйлахыг бацаанууд хэзээ ч харж байгаагүй. Тиймээс уйлахаараа ямар байхыг нь харах гэж бөөнөөрөө нийлж зодсон, нохойгоороо уруулсан, харанхуйд цочоож айлгасан, юмыг нь булааж эвдэлсэн, тэнэг уурлана уу гэхээс уйлаагүй, бацаануудыг гадаадаар баахан хараадаг ч тэгсхийгээд уур нь гарчихдаг.
“Манай өвөө ерөөсөө юм идэхгүй би бүх юмыг нь идэж байгаа” гэж хэлэхдээ ч тэр маасайж байсан. “Манай өвөө өчигдөр унтаад байсан, өнөөдөр унтаад байсан, маргааш яах юм бол би цээжилсэн хэдэн үгээ зааж өгье гэж бодсон чинь ерөөсөө босохгүй юм” гэж хэлэхдээ ч тэр уйлаагүй.
Өвгөн өнгөрснөөс хойш тэнэгийн өмссөн хувцас нь муудаж, царай зүс алдаж, гэрийнхээ ойролцоо нэг их харагдахаа больж, бацаануудтай тааралдах нь ч багасч. Гэхдээ хааяа нэг уулзалдахаараа инээд нь хэвээрэй, сурсан гадаад үгнүүдээ урсгаж бацаануудыг хөгжөөнө.
Нэг удаа тэнэг хүү баахан шил лааз шуудайлж үүрээд алхаж явахад нь бацаанууд тааралдаад “хэээе, маа ниггаа юугаа үүрээд яваад байна даа” гэхэд нь тэнэг хүү тэнэгээрээ инээснээ “хэе гайс, ит из маа капаатализм”. Харин бацаанууд тэр үгийн утгыг ойлгоогүй.